အချိန် ၆ နာရီထက် မည်သူမျှ ပိုမနေနိုင်သည့် ကမ္ဘာ့သရဲအခြောက်ဆုံးအိမ်ကြီး

သင်တို့အနေနဲ့ ကမ္ဘာ့ခြောက်ခြားစရာအကောင်းဆုံး သရဲခြောက်တဲ့ အိမ်ကြီးတ အိမ်ထဲမှာ ဘယ်လောက်အချိန်ကြာကြာ နေနိုင်လိမ့်မယ် ထင်ပါသလဲ။
ဒီမေးခွန်းက ဖြေရခက်ကောင်းခက်နေမှာဖြစ်ပေမယ့် အမေရိကန်နိုင်ငံ၊ ဆန်ဒီယေဂိုက မက်က်ကမ်မေးမန်နော်အမည်နဲ့ ဖွင့်လှစ်ထားတဲ့ အပန်းဖြေအိမ်ကြီးထဲကို ရောက် သွားမယ်ဆိုရင်တော့ သင့်အနေနဲ့ ဒီအဖြေအတွက် သေချာသွားပါလိမ့်မယ်။

အဲဒီအပန်းဖြေအိမ်ကြီးကို စိတ္တဇအိပ်မက်ဆိုးလို့ ဖော်ပြကြပြီး မှတ်တမ်းတွေအရ အိမ်ထဲမှာ တကယ့်ကို အချိန် ၆ နာရီထက် ပိုနေနိုင်သူ တဦးတယောက်မှ မရှိခဲ့သေးဘူးလို့ ဆိုပါတယ်။
အိမ်ကြီးထဲမှာ နေနိုင်မယ့်အချိန်ကို ၈ နာရီလို့ သတ်မှတ်ထားပြီး ဝင်ရောက်သူတွေက အိမ်ထဲမှာ ထိတ်လန့်ကြောက်ရွံ့စရာကောင်းတဲ့ တာရန်တူလာတွေ၊ ကြွက်အရှင်တွေနဲ့အတူ မျက်နှာဖုံးစွပ် ထိတ်လန့်စရာ လူတွေကိုလည်း ရင်ဆိုင်ကြရမှာပါ။

သွေးပျက်ထိတ်လန့်စရာကောင်းတဲ့ ရုပ်သံဗွီဒီယိုဖိုင်ထဲမှာတော့ သွေးပျက်ပြီး အော်ဟစ်နေကြသူတွေကို တွေ့ကြရမှာဖြစ်ပြီး တယောက်ကတော့ ကြောက်လွန်းလို့ သူ့ကို အထဲက ပြန်ထွက်ခွင့်ပေးဖို့ အော်နေခဲ့တာပါ။အိမ်ထဲက လူတွေဟာ အစစ်အမှန်တွေအတိုင်း ခံစားရမယ့် သွေးတုတွေ အလိမ်းလိမ်းနဲ့ ထိတ်လန့်ခြောက်ခြားနေခဲ့ကြရတာ ဖြစ်ပါတယ်။

ဒီသရဲခြောက်တဲ့ အိမ်ကြီးထဲမှာ အချိန် ၆ နာရီကြာ နေထိုင်နိုင်ခဲ့သူကတော့ ဆာရာ ပီအမည်ရသူဖြစ်ပြီး ၂ဝ၁၄ ခုနှစ်မှာ ဝင်ရောက်ခဲ့တာလို့ သည်ဆန်းသတင်းတပုဒ်မှာဖော် ပြပါတယ်။
ဒါပေမယ့် လက်ရှိအချိန်ထိတော့ ဒီခြောက်ခြားစရာအိမ်ကြီးထဲကို ဝင်ရောက်ဖို့ စောင့်ဆိုင်းနေကြသူ ၂ သောင်း ၄ ထောင်လောက် ရှိနေသေးတယ်လို့ ဆိုပါတယ်။

ထိတ်လန့်စရာကောင်းတဲ့ အတွေ့အကြုံကို ရယူလိုကြသူတွေအနေနဲ့ ဒီအိမ်ကြီးထဲ မဝင်ခင်မှာ ဆိုးဝါးတဲ့ ကျန်းမာရေးအခြေအနေဖြစ်မနေဖို့ စစ်ဆေးထားရမှာ ဖြစ်ပါတယ်။
၂ဝဝ၈ ခုနှစ်တုန်းက အိမ်ထဲကို ဝင်ရောက်ခဲ့တဲ့ ဧည့်သည်တဦးကတော့ နှလုံး တိုက်ခိုက်မှုခံခဲ့ရတာပါ။

ဒီအပန်းဖြေအိမ်ရဲ့ ပိုင်ရှင်ဖြစ်တဲ့ မက်က်ကမ်မေးကတော့ “ဒါက သွေးပျက်စရာ စခန်းတခုထဲက လွတ်မြောက်မှုရှာရတဲ့ အရာမျိုးပါ။ ဒီ(ကြောက်ရွံ့ထိတ်လန့်စရာတွေ) အရာတွေ အားလုံးက အစစ်အမှန်တွေ မဟုတ်ပါဘူး။ လူတွေ ထိခိုက်နစ်နာရတယ်ဆိုရင်တော့ ကျနော်တို့ အိမ်ကို ပိတ်သိမ်းမှာပါ”လို့ ပြောလိုက်ပါတယ်။